إحنا في زمن الكورونا

عادل‭ ‬بسيوني

أنا اللَّي ديماً

قالوا عني ابن العبيطه

عارفه ليه؟!

لمَّا يبقى الوِلْد لاهْبَل

أهْلُه ديماً مشتومين

جايب الشِتْمة تملِّي

وهُمَّه برضو الملعونين

مَثَل قالوه الناس ما بِينْهُم

مِن غباوتي متغاظين

***

أنا اللَّي ديماً 

قالوا عني ابن العبيطة

وهِيّه دوم كانت زكية

ولّا حويطه

طَب وليه؟

اكمِنّي يعني زي لأعْمَى

وجوز عيوني مفنجِلين

لَمْ تفدني جوز عيوني الدبلانين

قلبي ديماً كان رُهَيِّف

كان يِصَدَّق في البداية الكدابين

و الأَدِّله عليها دمغه

واللَّي شافع جوز شهود متأجرين

والوفود بتقولَّي حاسب 

والجميع بيكدبوهم

مش بعيد وبيرجموهم 

واللَّي كان ملعون أبوهم

 الا أنا بس الوحيد

علشان عنيد

قلبي ديماً كان مِصدَّق

رغم عقلي قالَّي حاسب

باعتباري وَادْ مدقدق

والإفادة كتير يا صاحبي

ماحنا في زمن الكورونا

***

اكتشفت الناس و لمَّا

شوفتها نهاية المَتَمَّة

والكلام دا كان مابينا

الوعود تكتر ما تكتر

والعلامات الزياده

والأكاده واضحه باينه

زي مَرْسوم العبادة

كدابين يابا ودْيابه

مش غلابه

والبجاحه

لمَّا توعدني بصراحه 

تِسد ديني

تلتزم وتقول دا حقك

قلب كافر بالوعود

بطلوا دا.. واسمعوا دا

يا خلق هُوهْ

داحنا في ايام الكرونا

***

جرجرونا هيحبسونا

واحنا ديماً جبارين

محتارين نبكي نِعَيّط 

أو نِظَّيط زهقانين

والعباد اللَّي احنا مِنهُم

لسّه مش عايزين نتوب

قلب جاحد بالحُدُود

واحنا مخلوطين بطين 

بالآهات ويَّا الأنين

حاجه أصغر من خَيَالَك

بُص شوف اللِّي جرالَك

اتعظ خَلِيك في حالك

يابني توب

الأمور لِسّاتها آيله للسقوط

مش مواسم

لسه بإيدين اللَّي قاسم

والنهار ده

كل خلق الدنيا ساجده للإله

لمَّا ظنوا في لحظه

قدروا ع الإله

كان يطاردني يعافر

ولمَّا خَد من قلبي حِته

ولِيْه يا غادر؟!

في النهاية اكٌمنه طاطا

عَضّ ايدي وبّسَاطا

بعد ما بسها وطاطا

المَلِك موجود يحاسب

ليه وهيَّه مش مكاسب 

عُود لربَّك

انته مش أد اللِّي واهب

صدقونا .. تكدبونا

مش مهم 

داحنا في ايام الكورونا

أنا اللِّي ديماً

قبل ذلك

قالوا عني ابن العبيطه

صدقوا دا.. واسمعوا دا 

ماحنا في زمن الكورونا..